Alla Itolae Nusa 49

1

Eleki Yakupe ikoti eni nanaru kai ibeteke lokosi be, “Imi lupu lomei tehaike au, leke au beteke saisa rebe ekena imi bobanu petu luare.”

2

“Au Yakupe, auku anaya, imi lene loko au, imi amate Israele.

3

Rubena, auku anae mena,

auku ktiline kena ale, ale auku anae menai kena aru belu sa.

aono elake ete auku anae maketaru kai aktili lesi beisi.

4

po laleume ndene mo saka kwelere tihoare

hoko alesi bei kwalimusi moneka

le antulu kai auku bina pialare,

aono asomie au, amaume.

5

Simone kai Lewi luasi sipate sakesa;

luasi ktilene kena ono neune.

6

Au suka saisa rebe luasi suka onore mo,

kai au lupu kaisi mo.

luasi nasu titinai eti esi bunu tamata,

luasi lulu esi sukare eti esi ono sapere keu tekwa mo.

7

Kutuke kena esi nasute mere le esi nasu ktili kuate.

Kutuke kena esi ono tiare le esi ono tiare lesi peneka.

Au onosi rue tebike bei lomai me pusue Israelare.

Au onosi rue papeleke Israele esi sukuru.

8

Yehuda alere, namake kwalimusi isike ale,

esi tatu beimu,

kai aseseke kena amu musuaru.

9

Ale saka singa beluke;

rebe ebunu binatane rebe ekanele,

eleki eleu loko esi otoi maka ruere,

erilie esi nanakwalaije eleki entulu,

sae inehe kena toneke mo.

10

Yehuda, bei amu anubuaru sae iono kamale,

eti pela kamale eheti bei amu anubuaru moneka,

pusue tamata bei bangsa makete esi keri tanei ete ale,

kai esi lene loko ale.

11

Amu keledai anaije alo kena ai,

anggure aini rebe mise titinai.

Atetake amu pakiane kena anggure kwelini,

anggure kwelini elala saka lalakwe.

12

Matamue lala le akinu anggure,

niseume puti le akinu susu.

13

Sebulone arue tehaike meite leini,

kapalaru utati kena amu meite leine,

eti roma ote kai kota Sidone.

14

Isakahare ale lupe keledai ktiline,

rebe entulu le taneia rebe ekerire.

15

Sepo iselu otoi mere mise

kai esi tapele nkopa,

hoko makerike ktilire po ikerike rame,

ikerike saka tamata makerike.

16

Dane ale, ateu pakala ete amu tamataru,

aono suku esa lupe sukua maketa mei Israele.

17

Ale saka niakwe eso lalane,

rebe tutu kudare esi tuneije,

eti esi upuije ibari.

18

TUHANE, au namake hlamate rebe tatike pine Arilukele.

19

Gate ale, tamata maka ndearu esi lisa kai ale,

po arana suike esi tanearu.

20

Asere ale, amu mananaru boka titinai,

kai ariluke manane ete kamalaru.

21

Naptali ale, saka maralane inai rebe sae isupu kerikele mo,

kai esi anaiju mise titinai.

22

Yusupe ale saka ai rebe kele tehaike kwelere,

esi buaije boka,

esi sanaiju nanu eti ulia pakale.

23

Musuaru esi atula leke bunui

esi suini kena busule.

24

Po Yusupe balaije ere ktili,

kena ineha eni busule,

le supu tapa bei Ile rebe Iktili titinai, mere auku Allare.

Ile rebe Iraka tamata Israelaru saka maka raka pipi kai dombaru. Alla rebe Iono ulate batu ete tamata Israelaru.

25

Auku Alla Itapa ale;

Ile rebe Ikbasa ela titinaije Iriluke misete ete ale;

baue ulane teture,

kwele bei tapale,

kai anubua boka,

26

gandume kai buna.

Ulataru eru me bei akmena sa, kai tamata bokala esi supu miseta bokala bei ete mere. Po Alla Iriluke misete ete aure lesi bei ulataru.

Misete bei Alla meru Iriluke pusulu ete ale noma,

le bei pusue imi kwalitoije Ibitike ale.

27

Benyamine ale saka binatane serigala nsolote.

Kena beleite ibunu eni musuaru.

Kena kpeture ilarake taneia rebe iranaule.”

28

Hoko pusue Israele eni kwetela butu esa lesini luaru esi lupuke lomai tehaikeni eleki Yakupe ikotie lesi kai ibeteke saisa rebe esi supure.

29

Eleki Yakupe ibeteke lokosi be,

“Sepo tatike pine au rue kai imi moneka le au keu lulu upuku, hoko hnouke au me upuku leine kena liane banai rebe me Eprone tamata Hete eni ndinu,

30

liane benai me ndinu mere eme Mahpela tehaike Mamre me tape Kanane, ndinu rebe Abrahame isabe bei Eprone tamata Hete leke iono kena eni kubure.

31

Ete mere hnouke Abrahame kai eni bina Sara, kai ete mere lekwe hnauke Isake kai eni bina Ripka,

32

Kai ete mere lekwe au hnouke Lea, le ndinu kai liane mere sabe bei tamata Hete.”

33

Kena Yakupe ihnau eni nanaru pela eleki isake eni lelale lolete eni niane maka ntulure eleki imata ne, hoko ikeu lulu upuisi.

alkitab.me